SIMBA SC YAINGIA SOKONI KUSAJILI WAPYA 6 WAPO MASTAA WA MTIBWA

KAMA Simba hii ikikamilika mmekwisha. Kocha wa Simba, Patrick Phiri ameutaka uongozi wa klabu hiyo kufanya usajili wa wachezaji sita wenye uwezo wa juu huku straika wa Mtibwa Sugar, Ame Ally na beki Hamis Kessy wakiwa chaguo lake la kwanza, Mwanaspoti linafahamu.

Mbali na mastaa hao wa Mtibwa,uongozi umetangaza kumnunua winga wa Yanga, Simon Msuva. Phiri alisema endapo uongozi utampa nafasi ya kupendekeza usajili wa wachezaji wa kigeni atawaletea mastaa wa maana kutoka Zambia.

Phiri aliingia matatani kwenye kikosi hicho baada ya Simba kucheza mechi sita bila kupata ushindi jambo ambalo amesema hataki litokee tena Msimbazi. Simba ilishinda mchezo mmoja pekee katika mechi saba za msimu huu na kutoka sare mara sita.

Kocha huyo alitumia muda wa siku mbili akiwa amejifungia  kwenye moja ya nyumba tulivu eneo la Kunduchi, Dar es Salaam kuandaa ripoti ya mechi saba za msimu huu na kutoa mapendekezo kadhaa ya marekebisho na kuikabidhi kwa viongozi juzi Jumatano mchana na jana Alhamisi alitarajia kukutana na viongozi wake kwa ajili ya kuijadili.

Kocha huyo wa zamani wa timu ya Taifa ya Zambia ‘Chipolopolo’, alisema anahitaji winga mmoja, kiungo mchezeshaji mmoja na straika wa kati mmoja ili kuifanya safu yake ya ushambuliaji kuwa ya kutisha zaidi nchini.

Imefahamika kuwa licha ya kocha huyo kuruhusiwa kupendekeza wachezaji kutoka Yanga na Azam, ameelekeza nguvu kubwa kuwanasa mastaa kadhaa kutoka kwenye kikosi cha Mtibwa wakiwemo straika Ame na Kessy.

“Nataka kikosi kifanyiwe marekebisho kadhaa hususani kwenye eneo la beki na ushambuliaji. Kwa kifupi ni kwamba nahitaji winga wa kulia mmoja, kiungo mchezeshaji mmoja na straika wa kati mmoja, nahitaji pia beki wa kulia mmoja na beki wa kati mmoja,” alisema Phiri na kubainisha kuwa anahitaji wachezaji sita pekee.

“Kuna wachezaji wawili wa Mtibwa nimewapendekeza, sema siwafahamu majina hivyo nimeandika namba zao, kuhusu wachezaji kutoka nje nimeliacha hilo kwa viongozi lakini kama wataniruhusu naweza kuja na wachezaji wazuri  kutoka Zambia,” anaeleza Phiri na kusema kuwa atakwenda kwao kwa mapumziko mwishoni mwa wiki hii.

Akieleza sababu za kuwapiga chini mastaa wa Yanga kwenye mapendekezo yake hayo, Phiri alisema bado hajaona mchezaji wa klabu hiyo mwenye kiwango cha juu wa kuweza kuisaidia Simba msimu huu hivyo ni vyema akasajili kutoka kwenye klabu nyingine ingawa tayari waajiri wake wametangaza rasmi kufukuzia saini ya Simon Msuva.

Taarifa za ndani kutoka Simba pia zinaeleza kuwa kuna uwezekano wa klabu hiyo kumrejesha beki Shomary Kapombe, ambaye yuko Azam lakini kwa makubaliano ya kubadilishana na mmoja wa mastraika wa timu hiyo jambo ambalo bado linajadiliwa.

Wakati huo huo, Phiri alisema anafahamu kuwa amebakisha mtihani mmoja ili aweze kuendelea na kibarua chake Simba na kuutaja mtihani huo kuwa ni kuifunga Yanga kwenye mechi ya Nani Mtani Jembe,  Desemba mwaka huu.

“Nafahamu kilichompata kocha wa Yanga (Ernest Brandts) msimu uliopita, nahafamu kuwa alifukuzwa baada ya kufungwa kwenye mechi hiyo, ni lazima nishinde ili kujiweka pazuri.

Mwanaspoti