OKWI NA DANGANYA TOTO YAKE KWA VIONGOZI WA SIMBA

SIMBA imempa ruhusa straika wake Emmanuel Okwi aende kwao Uganda kumalizia fungate yake kama alivyoaga, lakini mchezaji bado yuko Dar es Salaam huku wenzake wakiwa na timu Zanzibar wakishiriki Kombe la Mapinduzi.

Usiku wa jana Alhamisi, Simba ilicheza mechi yake ya kufungua michuano ya hiyo dhidi ya Mtibwa Sugar bila ya Okwi na Waganda wenzake; Juuko Murshid na Simon Sserunkuma ambao wametimkia kwao baada ya kutolipwa fedha zao za usajili.

Uongozi wa Simba unajua kwamba Okwi yupo Uganda lakini ukweli ni kwamba mchezaji huyo yupo Dar es Salaam.

Rafiki wa karibu na Okwi, alilithibitishia Mwanaspoti kuwa, mchezaji huyo hakwenda Uganda japokuwa aliomba ruhusa hiyo na viongozi kumruhusu lakini aliamua kufanya hivyo kwa sababu zake binafsi.

“Okwi ni rafiki yangu mkubwa, ni kweli yupo hapa Dar es Salaam na wala hakwenda Uganda,” alisema.

“Nilimshauri asifanye kwani Simba wamempa fedha nyingi za usajili, kwa nini awasumbue?” alihoji rafiki yake huyo.

Okwi alisaini mkataba mpya wa kuichezea Simba mwezi uliopita ambapo chanzo hicho kilifafanua kwamba katika fedha ya usajili, Okwi alipewa dola 30,000 (Sh 50 milioni) wakati anajiandaa kwenda kwao kufunga ndoa.

“Sijui kama kulikuwa na fedha zaidi ya hizo kwenye usajili wake kwani ninavyojua ni kwamba alipewa kiasi hicho na kwenda kwao, labda kama makubaliano ni zaidi ya hapo sijui kwani.

MWANASPOTI