OWINO AMPOKONYA CHOLLO UNAHODHA SIMBA SC

Kocha wa Simba, Patrick Phiri amemteua beki Joseph Owino kuwa nahodha mpya wa timu hiyo na atasaidiwa na kiungo mkongwe, Shaaban Kisiga.

Kabla ya kutwaa uongozi huo, Owino ambaye ni raia wa Uganda alikuwa nahodha wa muda wa timu hiyo, cheo alichokitwaa baada mtangulizi wake, Said Nassor ‘Cholo’ kuumia na kukaa nje ya dimba kwa muda mrefu.

Akizungumza kutoka Zanzibar iliko kambi ya Simba, Phiri alisema amewapa Owino na Kisiga majukumu hayo baada ya kuridhishwa na mwenendo wao ndani na nje ya uwanja.

“Uteuzi huu nimeufanya kwa kuzingatia mwenendo mzuri wa wachezaji hawa kuanzia ndani ya uwanja hadi nje, lakini pia uzoefu wao,” alisema kocha huyo Mzambia ambaye alipewa jukumu la kuinoa tena timu hiyo mapema mwezi huu.

“Hakuna shaka hata wachezaji wengine wamekubaliana na uteuzi huu na nina imani watakuwa viongozi wazuri mbele ya wenzao.”