MUSOTI NAE AIJIA JUU SIMBA KUIBURUZA SIMBA FIFA

 
SIMBA italazimika kumlipa beki Donald Mosoti jumla ya Sh48.5 milioni baada ya kuvunja mkataba wake uliobakiza mwaka mmoja na nusu.

Kwa kuvunja mkataba tu, Mosoti anaidai Simba Dola 29,250 (Sh47.5Milioni) na kiasi kingine anachodai ni Dola 600 (Sh 975,684) zilizobaki katika usajili ambapo jumla yake ni Sh 48.5 milioni. Pia Mosoti anamlipa Mwanasheria wake dola 2,000 (Sh3.25 milioni) kwa ajili ya kusimamia kesi hiyo.

Tayari Mwanasheria wa Mosoti, Felix Majani, ambaye pia ni mmoja wa wanasheria wa Shirikisho la Soka la Kimataifa (Fifa), amefungua kesi katika shirikisho hilo kuwashitaki Simba kwa kukiuka makubaliano ya mkataba na mteja wake.

Kabla ya kufungua kesi hiyo, Majani aliiandikia barua Simba akiitaka kukaa mezani ili kumaliza suala hilo, barua ambazo Rais wa Simba Evans Aveva amekiri kuzipokea, hata hivyo hawakuzifanyia kazi.

Baada ya kuona ukimya ukiendelea kutawala, Mwanasheria huyo ambaye aliwapa siku tatu Simba na kuwataka kumrudisha mchezaji huyo kambini na kupeleka jina lake Shirikisho la Soka Tanzania (TFF), ndipo alipoamua kufungua kesi hiyo.

“Niliyofanyiwa Simba ni unyama, ndio maana nimeona Mwanasheria wangu asimamie mwenyewe labda litakuwa fundisho hata kwa viongozi wengine,” alisema Mosoti.

“Sasa hivi wananiambia nitakuwa nafanya mazoezi na timu jambo ambalo halipo katika makubaliano ya mkataba wetu.”

Rais wa Simba, Evans Aveva alisema: “Ni kweli tumepata barua hizo tunazishughulikia.”

Moto umewaka katika kambi ya timu hiyo ikidaiwa Aveva amekasirishwa na kitendo cha baadhi ya viongozi kumuondoa Mosoti bila maelekezo yake.

MWANASPOTI