MAXIMO NIPO KAMILI KWA LIGI PHIRI SUBIRI KWANZA

Kocha wa Yanga, Marcio Maximo amejigamba kuwa kikosi chake kipo tayari kila idara kwa Ligi Kuu Bara, lakini mwenzake Patrick Phiri wa Simba ana kazi ya kuimarisha ubora katika safu yake ya ulinzi.

Mabingwa wa Ngao ya Jamii wataanza kampeni ya kusaka ubingwa wa Bara kwa kuivaa Mtibwa Sugar kwenye Uwanja wa Jamhuri, Morogoro Jumamosi wiki hii.

Rekodi zinambeba zaidi Maximo kwani katika mechi tano alizoiongoza Yanga, hajashindwa wala kuruhusu bao lolote langoni kwake huku Simba ikipoteza mechi moja na kutoka sare moja.

Yanga chini ya Maximo ilianza na ushindi wa bao 1-0 dhidi ya Chipukizi ya Pemba, bao lililofungwa na Genilson Santos ‘Jaja’, baadaye ikaifunga Shangani mabao 2-0 wafungaji wakiwa Andrey Coutinho na Salum Telela. Yanga pia iliilaza KMKM mabao 2-0 wafungaji wakiwa Coutinho na Hussein Javu kabla ya Jaja kufunga bao pekee wakati Yanga ilipoilaza Thika United ya Kenya. Yanga ilimalizia kwa ushindi mnono wa mabao 3-0 dhidi ya Azam FC mwishoni mwa wiki katika mechi ya Ngao ya Jamii,  Jaja akitikisa mabao mawili na jingine likifungwa na Simon Msuva.

Simba imecheza mechi sita na kushinda nne, imetoka sare moja na kufungwa moja. Simba ilizifunga Kilimani 2-1 kwa mabao ya Haruna Chanongo na Shaaban Kisiga, baadaye ikaifunga Mafunzo 2-0 (Chanongo na Elius Maguli) kabla ya kuitandika KMKM mabao 5-0 yaliyofungwa na Amissi Tambwe (mawili), Maguli, Kisiga na Amri Kiemba.

Baadaye Simba iliifunga Gor Mahia mabao 3-0 (Raphael Kiongera (mawili) na Ramadhan Singano), lakini ikachapwa bao 1-0 na URA ya Uganda na kumaliza kwa kwenda suluhu na Ndanda FC ya Mtwara kwenye Uwanja wa Nangwanda Sijaona mjini Mtwara.

Pamoja na rekodi hiyo kumbeba Maximo, kauli yake ya kutambia kikosi chake pia imekuja baada ya kuifunga Azam FC mabao 3-0.

Akizungumza na gazeti hili, Maximo alisema kikosi chake kimeonyesha mwanga wa kufanya vizuri msimu ujao kwani kila mtu anawajibika ipasavyo kwenye nafasi yake.

“Hapa unaweza kuona tumeshinda mchezo huu kwa kuwa kila idara inafanya kazi yake. Sisi watu wa benchi la ufundi tunafanya kazi kwa kushirikiana kwa karibu mno. Wasaidizi wangu kuanzia Neiva (Leonadro), Salvatory (Edward) na Shadrack (Nsajigwa) wote tunasilikizana,” alisema Maximo.

“Hata ukitazama wachezaji utagundua wote wana uwezo wa kucheza kikosi cha kwanza hivyo tena kwa mtindo tofauti tofauti ndiyo maana unaweza kuona anatoka fulani anaingia mwenzake ambaye anafanya vizuri pia.

“Ukiachana na mtindo tofauti hata uwezo wa wachezaji nao siyo wa aina moja hivyo wapo wachezaji watakaocheza aina fulani ya mechi kwa ajili ya matokeo fulani. Kwa jumla Yanga ina kikosi imara ambacho sasa kipo tayari kwa mapambano japokuwa kuna vitu vidogo vya kurekebisha,” alisema Maximo.

Kauli hiyo ya Maximo inachagizwa na kitendo cha Yanga kucheza mechi tano na kushinda zote huku ikiwa haijaruhusu hata bao moja katika nyavu zake na kupata mabao tisa huku straika Genilson Santos ‘Jaja’ akiongoza kwa kufunga mabao manne.
MWANANCHI